04/07 14:28
مين مابيحبش السينما؟ كبيرنا وصغيرنا مجنون بالاختراع اللي بيشدنا معاه لمدة ساعة أو ساعتين، ويمكن أكتر ما إحنا الكبار بنتشد وننبهر، الأطفال بتتشد يمكن أكتر مننا مليون مرة والموضوع بيفيدهم وينميهم، ده علشان في في الموضوع صورة وتمثيل وإلقاء وحكي وموسيقى وكمان قيم تربوية بتفيدهم.
سينما الأطفال زمان كانت ظاهرة ثابتة وموجودة، مش مجرد اسم بيتقال مع ايقاف التنفيذ، فمثلًا هنلاقي إن سيما مترو كانت حريصة على انها تعمل كل يوم جمعة حفلة سينما لجمهور الأطفال، الحفلة بتبدأ 10 الصبح وبتستمر لحد 12 وبيتم عرض أفلام كرتون عالمية، مش كده بس، بيتوزع على الأطفال شوكولاتة من كورونا في الأغلب بتبقى الروكيت، وبيتوزع كمان لعب هدية لكل طفل، ومش لعب صغيرة رمزية، لأ ده الهدية كانت بتبقى حاجة عليها القيمة كبيرة كده، وده كأن الطفل أخد تمن التذكرة بعد الفرجة، بس بعد وقف تمويل سيما مترو من برا التقليد ده انتهى ومابقاش بيحصل تاني.
بعدها بكام سنة اتعمل برنامج اسمه “سينما الأطفال” في التمنينات، وكانت بتقدمه المذيعة عفاف الهلاوي، وكان بيتعمل في نفس وقت الحفلة بتاعة سينما مترو، الساعة 10 الصبح يوم الجمعة، بيعرض أعمال عالمية زي “The Wizard of Oz” و المسلسل المشهور “الكلبة لاسي”. البرنامج كمان كان بيعتمد على ان الأطفال اللي هم الجمهور يبقى حاضر العروض ويتفاعل في البرنامج قدام الجمهور، ولكنه اتوقف بعد فترة وتم نسيان جمهوره تاني.
ومن جهود الإهتمام بسينما الطفل في الفترة دي كان عملنا للأعمال الخاصة بيهم مهرجان، آه والله زي ما بقولك كده، واسمه مهرجان القاهرة السينما الأطفال وتم تأسيسه سنة 1990، كان بيتعرض فيه كل الأعمال الخاصة بالطفل، من كل البلدان وبيتم تقييمها وبتاخد جوايز كمان وبيحضره نجوم العالم والصناعة دي، المهرجان لسة موجود بس بيشارك فيه أبعد الناس عن المجال اللي هو نفسه مابقاش موجود.
دلوقتي سينما الأطفال في مصر مابقتش موجودة، يعني مش هنلاقي حفلات سينما مخصوصة للأطفال ولا برنامج يعرض للي مايقدروش يروحوا السينما اهم الأفلام والأعمال الخاصة بيهم، دلوقتي السينما العالمية هي بس اللي بتصدرلنا أفلام ليها علاقة بالأطفال، والحفلات في السينما بتبقى مليانة شباب وكبار وعدد الأطفال قليل وزنهم مش محبب ولا مرغوب فيه، مع إن الكائن الصغير ده السينما بالنسبة له أهم وأنفع، ومحتاج يتعلم بكل الطرق الممكنة، بس أهو نعمل ايه بقى، حكم القوي على الضعيف وحكم الكبار على سينما الأطفال.
